Sikh Website Dedicated Website For Sikh In World
ਪੰਜਾਬ ‘ਚ ਵਿਚਰ ਰਹੇ ਕਈ ਲੋਕਾਂ ਦੇ ਵਿਚਾਰ ਅੱਜ ਵੀ ਆਪਣੇ ਵਿਰਸੇ ਨਾਲ ਜੁੜ੍ਹੇ ਹੋਏ ਹਨ। ਇਨ੍ਹਾਂ ਵਿਚਾਰਾਂ ਅਤੇ ਵਿਰਸੇ ਦੀ ਅਨੋਖੀ ਝਲਕ ਦੇਖਣ ਨੂੰ ਕੀਤੇ ਕੀਤੇ ਹੀ ਮਿਲਦੀ ਹੈ। ਅੱਜ ਦੇ ਲੋਕ ਨਵੇਂ ਜਮਾਨੇ ਨਾਲ ਤੁਰਨ ਦੀ ਗੱਲਾਂ ਕਰਦੇ ਹਨ ਜੋ ਕਿ ਚੰਗੀ ਗੱਲ ਵੀ ਹੈ ਪਰ ਆਪਣੇ ਵਿਰਸੇ ਨੂੰ ਕਦੇ ਵੀ ਪਿੱਛੇ ਨਹੀਂ ਛੱਡਣਾ ਚਾਹੀਦਾ। ਇਸ ਵਿਰਸੇ ਦੀ ਝਲਕ ਅੱਜ ਫਰੀਦਕੋਟ ‘ਚ ਦੇਖਣ ਨੂੰ ਵੀ ਮਿਲੀ।
ਪੰਜਾਬ ਦੇ ਫਰੀਦਕੋਟ ਜ਼ਿਲ੍ਹੇ ਦੇ ਪਿੰਡ ਸ਼ੇਰ ਸਿੰਘ ਵਾਲਾ ਦੇ ਸਾਬਕਾ ਸਰਪੰਚ ਗੁਰਜਿੰਦਰ ਸਿੰਘ ਦੀ ਪੜ੍ਹੀ ਲਿਖੀ ਕੁੜੀ ਦਾ ਵਿਆਹ ਉਸ ਸਮੇਂ ਖਿੱਚ ਦਾ ਕੇਂਦਰ ਬਣ ਗਿਆ ਜਦੋਂ ਅਜੋਕੀ ਜਿੰਦਗੀ ‘ਚੋ ਅਲੋਪ ਹੁੰਦੇ ਜਾ ਰਹੇ ਪੰਜਾਬੀ ਸਭਿਆਚਾਰ, ਰੀਤੀ ਰਿਵਾਜਾਂ ਅਤੇ ਪੰਜਾਬੀ ਪਹਿਰਾਵੇ ਨਾਲ ਨੱਚਦਾ ਟੱਪਦਾ ਅਤੇ ਗਿੱਧਾ ਪਾਉਂਦਾ ਨਾਨਕਾ ਮੇਲ ਮਹਿੰਗੀਆਂ ਗੱਡੀਆਂ ਦੀ ਥਾਂ ਬਲਦਾਂ ਵਾਲੇ ਗਡਿਆਂ ‘ਤੇ ਪਿੰਡ ਪੁੱਜਾ।
ਜਿਸ ਲਈ ਪਿੰਡ ਵਾਸੀ ਕੋਠਿਆਂ ‘ਤੇ ਚੜ੍ਹ ਕੇ ਸਦੀਆਂ ਪੁਰਾਨੇ ਰੀਤੀ ਰਿਵਾਜਾਂ ਨਾਲ ਆਏ ਮੇਲ ਨੂੰ ਦੇਖਣ ਲਈ ਮਜਬੂਰ ਹੋ ਗਏ। ਆਖਿਰ ਪੱਛਮੀ ਪਹਿਰਾਵੇ ਨੂੰ ਛੱਡ ਕੇ ਪੰਜਾਬੀ ਰਿਵਾਇਤੀ ਪਹਿਰਾਵੇ ਨਾਲ ਹੋ ਰਹੇ ਵਿਆਹ ਦਾ ਅਸਲ ਨਜ਼ਾਰਾ ਦੇਖਿਆਂ ਹੀ ਬਣਦਾ ਸੀ।
ਇਸ ਮੌਕੇ ਇੱਕ ਪਿੰਡ ਵਾਸੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇਹ ਬਹੁਤ ਹੀ ਵਧੀਆ ਲਗਾ ਕੇ ਉਨ੍ਹਾਂ ਦਾ ਦੋਸਤ ਸਾਬਕਾ ਸਰਪੰਚ ਆਪਣੀ ਪੜ੍ਹੀ ਲਿਖੀ ਲੜਕੀ ਦਾ ਵਿਆਹ ਪੁਰਾਣੇ ਸੱਭਿਆਚਾਰ ਨਾਲ ਕਰ ਰਿਹਾ ਹੈ ਅਤੇ ਉਨ੍ਹਾਂ ਨੇ ਸਾਰੇ ਹੀ ਪੰਜਾਬ ਵਾਸੀਆਂ ਨੂੰ ਵੀ ਅਪੀਲ ਕੀਤੀ ਹੈ ਕੇ ਉਹ ਵੀ ਮਹਿੰਗੇ ਪਹਿਰਾਵੇ ਅਤੇ ਮਹਿੰਗੇ ਵਿਆਹਾਂ ਦੇ ਰਿਵਾਜ ਨੂੰ ਛੱਡ ਕੇ ਆਪਣੇ ਅਸਲ ਪੰਜਾਬੀ ਪਹਿਰਾਵੇ ਨਾਲ ਵਿਆਹ ਸ਼ਾਦੀਆਂ ਕਰਨ।
ਇਸ ਮੌਕੇ ਭਾਵਿਕ ਹੁੰਦੇ ਹੋਏ ਲੜਕੀ ਦੇ ਪਿਤਾ ਨੇ ਕਿਹਾ ਕਿ ਉਹ ਪਰਮਾਤਮਾ ਦਾ ਸ਼ੁਕਰ ਗੁਜ਼ਾਰ ਹੈ ਕਿ ਉਹ ਆਪਣੀ ਲੜਕੀ ਨਹੀਂ ਬਲ ਕੇ ਆਪਣੇ ਲੜਕੇ ਦਾ ਵਿਆਹ ਪੁਰਾਣੇ ਵਿਰਸੇ, ਸੱਭਿਆਚਾਰ ਵਾਲੇ ਤੋਰ ਤਰੀਕੇ, ਪੁਰਾਣੇ ਪਹਿਰਾਵੇ ਪਾ ਕੇ ਸਾਡੇ ਢੰਗ ਨਾਲ ਕਰ ਰਿਹਾ ਹੈ। ਇਸ ਮੌਕੇ ਵਿਆਹ ਵਾਲੀ ਮੁਟਿਆਰ (ਲਾੜੀ) ਜਤਿੰਦਰ ਕੌਰ ਜੋ ਕਿ ਐੱਮ.ਏ ਦੀ ਵਿਦਿਆਰਥਣ ਹੈ, ਨੇ ਕਿਹਾ ਕਿ ਮੇਰੀ ਬਚਪਨ ਦੀ ਰੀਝ ਸੀ ਕਿ ਮੇਰਾ ਵਿਆਹ ਪੱਛਮੀ ਪਹਿਰਾਵੇ ਦੀ ਥਾਂ ਪੰਜਾਬੀ ਸਭਿਆਚਾਰ ਨੂੰ ਉਤਸ਼ਾਹਿਤ ਕਰਦੇ ਢੰਗ ਨਾਲ ਹੋਵੇ ਅਤੇ ਮੇਰੇ ਮਾਪਿਆਂ ਨੇ ਮੇਰੇ ਲਈ ਉਸੇ ਤਰ੍ਹਾਂ ਵਿਆਹ ਕਰਨ ਦਾ ਤਰੀਕਾ ਅਪਨਾਇਆ।
ਮੇਰੇ ਨਾਨਕੇ ਪੁਰਾਣੇ ਵਿਰਸੇ ਨੂੰ ਦਰਸਾਉਂਦੇ ਹੋਏ ਬਲਦਾਂ ਵਾਲੇ ਗਡਿਆਂ ‘ਤੇ ਗਲਾਂ ਵਿਚ ਕੈਂਠੇ ਅਤੇ ਹੱਥਾਂ ਵਿਚ ਖੂੰਡੇ ਫੜਕੇ ਉਸ ਦੇ ਮਾਮੇ ਅਤੇ ਘੱਗਰੇ ਫੁਲਕਾਰੀਆਂ ਵਿੱਚ ਸਜੀਆਂ ਉਸ ਦੀਆਂ ਮਾਮੀਆਂ ਮੇਲਣਾਂ ਬਣਕੇ ਸਿੱਠਣੀਆਂ, ਗੀਤ, ਬੋਲੀਆਂ, ਪਾਹੁੰਦੇ ਹੋਏ ਨਾਨਕਾ ਮੇਲ ਬਣਕੇ ਆ ਰਹੇ ਹਨ। ਸੋ ਮੇਰੇ ਮਾਮੇ, ਮਾਮੀਆਂ ਨੇ ਰਿਵਾਇਤੀ ਢੰਗ ਨਾਲ ਸ਼ਾਦੀ ਵਿਚ ਸ਼ਾਮਲ ਹੋ ਕੇ ਮੇਰੀ ਇੱਛਾ ਪੂਰੀ ਕੀਤੀ ਹੈ ਇਸ ਕਰਕੇ ਉਸ ਨੂੰ ਬਹੁਤ ਖੁਸ਼ੀ ਹੋ ਰਹੀ ਹੈ।
